వరుణ్ కొత్త సినిమా స్టార్ట్
cinema | Suryaa Desk | Published : Thu, Apr 19, 2018, 03:00 PM
|
|
మెగా ప్రిన్స్ వరుణ్ తేజ్ కొత్త సినిమాను ప్రారంభించారు. ‘ఘాజీ’ లాంటి జాతీయ అవార్డు చిత్రాన్ని తెరకెక్కించిన సంకల్ప్‌రెడ్డి ఈ సినిమాకు దర్శకత్వం వహిస్తున్నారు. లావణ్య త్రిపాఠి, ‘చెలియా’ ఫేం అదితిరావ్ హైదరి హీరోయిన్లుగా నటిస్తున్నారు. క్రిష్ జాగర్లమూడితో ‘గమ్యం’, ‘కృష్ణం వందే జగద్గురుం’, ‘కంచె’, ‘గౌతమీపుత్ర శాతకర్ణి’ చిత్రాలను నిర్మించిన ఫస్ట్‌ ఫ్రేమ్ ఎంటర్‌టైన్‌మెంట్స్ ఈ చిత్రాన్ని నిర్మిస్తోంది. ఫస్ట్‌ ఫ్రేమ్ ఎంటర్‌టైన్‌మెంట్స్‌కు ఇది ఆరో సినిమా. అలాగే ‘కంచె’ సినిమాకు పనిచేసిన సినిమాటోగ్రాఫర్ వి.ఎస్.జ్ఞానశేఖర్ ఈ సినిమాకు ఛాయాగ్రహణం అందిస్తున్నారు. క్రిష్ జాగర్లమూడి కూడా ఈ సినిమాకు పనిచేస్తుండటం విశేషం.
ఇంకా టైటిల్ ఖరారు చేయని ఈ సినిమాను గురువారం హైదరాబాద్‌లో లాంఛనంగా ప్రారంభించారు. పూజాకార్యక్రమాల అనంతరం వరుణ్ తేజ్, లావణ్య త్రిపాఠి, అదితిపై మెగా బ్రదర్ నాగబాబు క్లాప్ కొట్టి షూటింగ్‌ను ప్రారంభించారు. సంకల్ప్‌రెడ్డితో సినిమా చేస్తుండటం చాలా ఆనందంగా ఉందని వరుణ్ ట్వీట్ చేశారు. అలాగే ‘కంచె’ తరవాత మళ్లీ రాజీవ్ రెడ్డి, క్రిష్, జ్ఞానశేఖర్‌తో కలసి పనిచేస్తుండం చాలా సంతోషమన్నారు. ఈ ప్రాజెక్ట్‌లోకి లావణ్య త్రిపాఠి, అదితిరావ్ హైదరికి స్వాగతమంటూ ట్వీట్‌లో పేర్కొన్నారు. ఇదిలా ఉంటే, చిత్రం పూజా కార్యక్రమాలు నిర్వహించిన చోలే బ్లూ, గ్రీన్ మ్యాట్‌లు వేశారు. అంటే ఈ సినిమాలో కూడా సంకల్ప్‌రెడ్డి గ్రాఫిక్స్‌కు పెద్ద పీఠ వేస్తున్నట్లే అనిపిస్తోంది
|
|
|