క్యాస్టింగ్ కౌచ్‌పై సమంత ఘాటు స్పందన

గతకొంతకాలంగా టాలీవుడ్‌ని కుదిపేస్తున్న ‘క్యాస్టింగ్ కౌచ్’ (ఆఫర్ల పేర్లుతో అమ్మాయిల్ని వాడుకోవడం) వివాదంపై అక్కినేని కోడలు, టాలీవుడ్ టాప్ హీరోయన్ సమంత స్పందించారు. శ్రీరెడ్డి అర్ధనగ్న ప్రదర్శనతో టాలీవుడ్ క్యాస్టింగ్ కౌచ్ వివాదం దేశ వ్యాప్తంగా హాట్ టాపిక్ అయ్యింది. అవకాశాలను ఎరగా చూపి ఇండస్ట్రీకి చెందిన బడా వ్యక్తులు, వాళ్ల పుత్రరత్నాలు నన్ను వాడుకున్నారంటూ బహిరంగ పోరుకు సిద్దమైన శ్రీరెడ్డికి బాసటగా అనేక మంది నిలిచారు. చాలా మంది క్యారెక్టర్ ఆర్టిస్ట్‌లు తమనూ అవకాశాలపేరుతో వాడుకున్నారంటూ మీడియాకెక్కారు. ఇక శ్రీరెడ్డి నిరసన ఉద్యమరూపం దాల్చడం.. మహిళా ప్రజా సంఘాల మద్దతు ఆమెకు లభించడంతో ఆమె నిరసన ఉద్యమం రూపం దాల్చింది. ఈ తరుణంలో ఆమె ఉద్యమం రాజకీయ రంగు పులుము కోవడం.. శ్రీరెడ్డి నోటికొచ్చినట్లు ఈ వివాదంతో సంబంధం లేనివారిపై అసందర్భ ఆరోపణలు చేయడంతో ఆమె ఉద్యమం నీరు కారిపోయింది. 

ఇదిలా ఉంటే తాజా వివాదంపై సమంత ఘాటుగా స్పందించారు. ‘ఇలాంటి నీచులు ఒక్క సినిమా ఇండస్ట్రీలోనే కాదు అన్ని రంగాల్లోనూ ఉన్నారు. క్యాస్టింగ్ కౌచ్‌ అనేది ఒక్క పరిశ్రమకే పరిమితం కాదు. అమ్మాయిల బలహీనతలను ఆసరాగా తీసుకునే నీచులో అన్ని చోట్లా ఉన్నారు. అందుకే ఈ విషయంలో ఒక్క సినిమా ఇండస్ట్రీని మాత్రమే టార్గెట్ చేయడం మంచిది కాదు. అయితే ఇండస్ట్రీలో నిలదొక్కుకోవాలంటే హిట్, ఫ్లాప్‌లు అనేవి చాలా కీలకం. నేను నటించిన తొలి చిత్రమే హిట్ కావడంతో నాకు ఇలాంటి కష్టాలు ఎదురుపడలేదు. చాలా ఏళ్లుగా తెలుగు, తమిళ సినిమాల్లో చేస్తున్నా.. నాకైతే ఇలాంటి అనుభవాలు ఎదురవ్వలేదు. 

అయితే చాలా మంది ఇండస్ట్రీలో ఏదో జరిగిపోతుందని అంటున్నారని.. చెడును ఎక్కువగా ప్రచారం చేస్తున్నారన్నారు. మంచి చెడులు ఎక్కడైనా ఉంటాయి. కాని నేను చూసినంతవరకూ ఇండస్ట్రీలో చాలా వరకూ మంచే ఉంది. నా సినీ ప్రయాణంలో ఎంతో మంది మంచి వ్యక్తులు తారసపడ్డారు. అందుకే ఈ రీల్ లైఫ్ జీవితాన్ని రియల్ లైఫ్‌లో ఆనందించేందుకు ఇండస్ట్రీకి చెందిన చైతూని పెళ్లి చేసుకున్నా.. రేపటి రోజున మాకు పిల్లలు పుట్టినా వాళ్లు ఇండస్ట్రీలో ఉండొచ్చు. నాకు పిల్లలు పుట్టినా.. సినిమాలు మాత్రం వదలను. నాకు పరిశ్రమ అద్భుతమైన జీవితం ఇచ్చింది. ఆ జీవితంలో చానాళ్లు ప్రయాణం చేయాలని ఉందంటూ’ ఇండస్ట్రీపై ఉన్న అభిప్రాయాలను వ్యక్తపరిచారు సమంత.