‘నీకు సిగ్గులేదు’ పవన్ నాకిచ్చిన కాంప్లిమెంట్ ఇదే: రవితేజ

మాస్ రాజా రవితేజ హీరోగా.. కళ్యాణ్ కృష్ణ దర్శకత్వంలో తెరకెక్కిన మాస్ ఎంటర్ టైనర్ మూవీ ‘నేల టిక్కెట్’ ఆడియో వేడుక గురువారం నాడు హైదరాబాద్‌లో వైభవంగా జరిగింది. ఈ మెగా ఈవెంట్‌కు పవర్ స్టార్ పవన్ కళ్యాణ్ ముఖ్య అతిథిగా హాజరయ్యారు. ఈ సందర్భంగా మాస్ రాజా రవితేజ మాట్లాడుతూ.. ‘హ్యపీ బర్త్ డే సత్యనారాయణ గారూ మీ కొడుకు (కళ్యాణ్ కృష్ణ) ఈ సినిమాతో హ్యాట్రిక్ హిట్ కొడుతున్నాడని ఆశిస్తున్నా. ఓ 10 సంవత్సరాల క్రితం నాకు పవన్ ఓ కాంప్లిమెంట్ ఇచ్చారు. అది ఏంటంటే మీరు ఇంత సిగ్గులేకుండా ఎలా చేస్తారు అని అప్పట్లో అన్నారు. అదే నా జీవితంలో బెస్ట్ కాంప్లిమెంట్. అప్పట్లో బాగా కలిసే వాళ్లం ఇప్పుడు బిజీగా ఉండటం వల్ల కలవడం లేదు. ఇప్పుడు ఈ స్టేజ్ మీద పవన్ ఎలా ఉన్నారో అంతే సరదాగా ఉంటారు. ఆయన ‘నేల టిక్కెట్’ ఆడియో వేడుకకు రావడం చాలా ఆనందంగా ఉంది. 

ఈ చిత్ర దర్శకుడు కళ్యాణ్ కృష్ణ ఈ చిత్రంతో నాకు మంచి స్నేహితుడు అయ్యారు. సెట్‌లో చాలా సరదాగా ఫుల్ జోష్‌లో ఉంటారు. ఎక్కువగా ఆడవాళ్ల మధ్యలో ఉంటారు. అందర్నీ కలుపుకుని పోతారు. ఈ చిత్రం పెద్ద సక్సెస్ అవ్వాలని కోరుకుంటున్నా.. మా ‘నేల టిక్కెట్టు’ చిత్రాన్ని ప్రేక్షకులు ఆదరిస్తారని కోరుకుంటున్నా అంటూ స్పీచ్ ముగించారు రవితేజ. 

ఈ చిత్రం ద్వారా మోడల్‌ మాళవిక శర్మ హీరోయిన్‌గా టాలీవుడ్‌కు పరిచయం అయ్యింది. జగపతిబాబు, బ్రహ్మానందం, జయప్రకాశ్, రఘుబాబు, సుబ్బరాజు, ఆలి, పోసాని కృష్ణమురళి, ప్రభాస్ శీను, సురేఖా వాణి తదితరులు ముఖ్యపాత్రల్లో నటిస్తున్న ఈ చిత్రానికి శక్తికాంత్ కార్తీక్ సంగీతాన్ని అందించారు. మే 24న భారీ అంచనాలతో ప్రేక్షకుల ముందుకు రానుంది ‘నేల టిక్కెట్’.