సన్నిలియోన్ రాకతో గంటల తరబడి ట్రాఫిక్ జామ్

జిస్మ్ 2 సినిమాతో బాలీవుడ్‌కి పరిచయమైన సన్నిలియోన్‌కి ఇక్కడి ఇండస్ట్రీలో ఎంత ఫ్యాన్ ఫాలోయింగ్ వుందో మరోసారి చాటిచెప్పిన ఘటన ఇది. ఆమెకి వున్న ఫ్యాన్ ఫాలోయింగ్ కేవలం ఉత్తర భారత దేశానికే పరిమితం కాదు... సౌతిండియాలోనూ సన్నీకి భారీ సంఖ్యలో ఫ్యాన్స్ వున్నారని నిరూపించిందీ ఘటన. కేరళలోని కొచ్చిలో ఓ ప్రైవేటు ఫంక్షన్‌లో పాల్గొనేందుకు ఇవాళ సన్నిలియోన్ అక్కడికి చేరుకుంది. అయితే, సన్నిలియోన్ వస్తుందనే సమాచారం అందుకున్న ఫ్యాన్స్ ఆమెకన్నా ముందుగానే అక్కడికి చేరుకున్నారు. ఉదయం 8 గంటల నుంచే భారీ సంఖ్యలో అక్కడికి చేరుకున్న జనంతో కొచ్చిలోని ఎంజీ రోడ్ రద్దీతో కిక్కిరిసిపోయింది. దీంతో గంటల తరబడి రోడ్‌పై రాకపోకలు నిలిచిపోయాయి. సన్నిలియోన్‌ని చూసేందుకు ఎగబడిన జనాన్ని కంట్రోల్ చేయడం పోలీసులకి కష్టంగా మారింది. దీంతో పలుసార్లు లాఠీ ఛార్జ్ కూడా చేయాల్సి వచ్చింది.

సన్నిలియోన్ పాల్గొన్న ప్రైవేటు ఫంక్షన్ వేదిక పరిసరాలన్నీ ఆమె అభిమానులతో నిండిపోయాయి. ఎంజీ రోడ్ కనుచూపుమేరలో కనిపించిన ప్రతీ బిల్డింగ్, బస్సు, హోర్డింగులు, చివరకు మెట్రో పిల్లర్లపై సైతం ఎక్కికూర్చున్నారు జనం. సన్నీని ఒక్కసారైనా తనివితీరా చూడాలనే ఆశ ఆమె చుట్టూ చేరిన ఫ్యాన్స్‌లో కనిపించింది.

ఇదిలావుంటే, సన్నిలియోన్ రాక కారణంగా గంటల తరబడి రోడ్లు జామ్ అవడంపై స్థానికులు ఆగ్రహం వ్యక్తంచేస్తున్నారు. సన్నిలియోన్‌పై ఆమె అభిమానులకి వున్న వ్యామోహానికి ఇది పరాకాష్ట అని కొందరు అభిప్రాయపడితే... నిర్వాహకుల వైఫల్యం వల్లే ఈ న్యూసెన్స్ జరిగిందంటూ ఇంకొందరు మండిపడుతున్నారు. ఏదేమైనా గంటల తరబడి ట్రాఫిక్ జామ్ అవడానికి కారణమైన ఈ ఘటనపై కేసు నమోదు చేయాల్సిందిగా ఆదేశించినట్టు వెస్ట్ జోన్ ట్రాఫిక్ ఏసీపీ నజీర్ ఎంఏ తెలిపారు.