ముమైత్ ఎలిమినేట్.. కానీ ఇంకా హౌజ్‌లోనే

తెలుగు బుల్లితెర బిగ్గెస్ట్ రియాలిటీ షో బిగ్ బాస్ సీజన్ 1 ఈ శని, ఆదివారాలు చాలా హుషారుగా సాగింది. బిగ్ బాస్ హౌజ్‌లో ఉన్న పోటీదారులతో పాటు హోస్ట్ ఎన్టీఆర్ తనదైన శైలిలో ప్రేక్షకులకు వినోదం పంచారు. ఈ వారం ఎలిమినేషన్‌కు నామినేట్ అయిన ముగ్గురిలో శనివారం హరితేజను సేఫ్ జోన్‌లోకి పంపిన ఎన్టీఆర్.. ఆదివారం (36వ ఎపిసోడ్) ముమైత్ ఖాన్ ఎలిమినేట్ అయినట్లు ప్రకటించారు. దీంతో అర్చన సేఫ్ జోన్‌లోకి వెళ్లిపోయింది. హౌజ్‌మేట్స్ అందరికీ టాటా బైబై చెప్పి హౌజ్ నుంచి ముమైత్ బయటికి వచ్చేసింది. ఇక ఎప్పటిలానే తన అనుభవాలు చెప్పాల్సిందిగా ఎన్టీఆర్ ముమైత్‌ను అడిగారు. అలాగే హౌజ్‌లో ఉన్న సహచర పోటీదారుల గురించి ఏమనుకుంటున్నారో చెప్పాలని ముమైత్‌ని కోరారు. ఇక ‘నా టీవీ’లోకి వెళ్లి హౌజ్‌మేట్స్ గురించి వాళ్లకే నేరుగా సూచనలిచ్చారు.

ముందుగా హరితేజ గురించి చెబుతూ.. మీరు లోపల లోపలే కుమిలిపోకండి, మీ బాధను బయటికి చెప్పండి అని సలహా ఇచ్చింది ముమైత్. అలాగే కత్తి కార్తీకకు కూడా ఓపెన్‌గా చెప్పాలని సూచించింది. ఇక శివ బాలాజీ గురించి మాట్లాడుతూ.. ‘కోపం ఉండాలి. అది నీ ఎమోషన్. కానీ ఏదైనా చెప్పేటప్పుడు ముందే కోపం ప్రదర్శించొద్దు. దాని వల్ల వాళ్లు మీ కోపాన్ని తీసుకుని మీరు చెప్పే విషయాన్ని వదిలేస్తారు’ అని చెప్పుకొచ్చింది. ఈ సమయంలో దీక్ష కొంచె ఓవర్ యాక్షన్ చేసినట్లు అనిపించింది. ముమైత్ వెళ్లిపోతున్నందుకు బాధగా ఉందని ఏడ్చేసింది. కానీ ఎన్టీఆర్ ఓ సూటి ప్రశ్న అడిగారు. ‘ఇందాక అర్చన సేఫ్ జోన్‌లోని వెళ్లారని చప్పట్లు కొట్టారు’ అని ఎన్టీఆర్ అనగానే దీక్ష కవర్ చేసే పనిలో పడ్డారు.

ఇలా ప్రతి ఒక్కరికి ముమైత్ సూచనలు, సలహాలు ఇచ్చారు. ఈ కార్యక్రమం అయిపోగానే ముమైత్‌కు ఎన్టీఆర్ ఓ బిగ్ బాంబ్ ఇచ్చారు. ఆమె దాన్ని శివ బాలాజీపై వేశారు. ఇంతకీ ఆ బిగ్ బాంబ్ ఏంటంటే.. శివ బాలాజీ ఇకపై ఏం మాట్లాడలనుకున్నా ముందు ‘ము.. ము.. ము.. ము.. ము..’ అంటే ‘ము’ని ఐదుసార్లు చెప్పిన తరవాతే మాట్లాడాలి. శివ బాలాజీతో కాసేపు ట్రైల్స్ వేయించి ఎన్టీఆర్ నవ్వించారు. ఇక ఆఖరిగా ముమైత్‌కు టాటా చెప్పే కార్యక్రమం. ఈ సమయంలో ముమైత్ కాస్త ఉద్వేగానికి లోనయింది. కంటతడి పెట్టేసింది. కానీ ఎన్టీఆర్ ఓ ట్విస్ట్ ఇచ్చారు. ముమైత్ బిగ్ బాస్ షో నుంచి ఎలిమినేట్ కావట్లేదని ప్రకటించారు.

ముమైత్ తనను తాను ఎలిమినేషన్‌కు నామినేట్ చేసుకోవడం వల్ల ప్రేక్షకులు ఆమెకు అత్యధికంగా ఓట్లు వేసినట్లు బిగ్ బాస్ భావించారని ఎన్టీఆర్ చెప్పారు. ఒకవేళ తాను నామినేట్ చేసుకోకపోయి ఉంటే అసలు ఎలిమినేషన్ ఓటింగ్‌లో ఉండేదే కాదని చెప్పారు. కాబట్టి మళ్లీ బిగ్ బాస్ తనను హౌజ్‌లో వెళ్లాల్సిందిగా ఆదేశించారని వెల్లడించారు. అయితే ఆమె నేరుగా హౌజ్‌మేట్స్ దగ్గరకి కాకుండా ఓ సీక్రెట్ రూంలోకి వెళ్తుంది. అక్కడి నుంచి హౌజ్‌లోకి ఎప్పుడు వెళ్తారు.. ఎలా వెళ్తారు అనేది బిగ్ బాస్ చేతులోనే ఉంది. ఈ సీక్రెట్ రూంలో నుంచి ముమైత్ బిగ్ బాస్ కళ్లతో హౌజ్‌మేట్స్‌ని చూస్తారు. ఈ విషయం హౌజ్‌మేట్స్‌కి తెలీదు. మరి సీక్రెట్ రూంలో ముమైత్‌కి ఎలాంటి అనుభవాలు ఎదురయ్యాయో 37వ ఎపిసోడ్‌లో అంటే సోమవారం చూడాలి.