ఒకవైపు బాలీవుడ్ తో పాటు హాలీవుడ్ వరకూ ఫేమస్ అయిపోయింది దీపికా పదుకునే. చేతినిండా అవకాశాలతో, హీరోలకు మించిన స్థాయి పారితోషకాలు అందుకుంటూ.. స్టార్ హీరోయిన్ గా కోట్ల రూపాయలను ఆర్జిస్తోందీమె. ఇప్పుడు బాలీవుడ్ టాప్ హీరోయిన్ దీపికనే అనేందుకు ఎలాంటి సంశయమూ అక్కర్లేదు. ఇలా దూసుకుపోతున్న దీపికకు తగిన వరుడిని చూసే ప్రయత్నాల్లో ఉన్నారట ఆమె తండ్రి. ఇది గాసిప్ కాదు, రూమర్ కాదు.. స్వయంగా దీపికనే ఈ విషయాన్ని వెళ్లడించింది.
బాలీవుడ్ సీనియర్ నటీమణి, ఎంపీ హేమమాలిని బయోగ్రఫీని ఆవిష్కరించిన కార్యక్రమంలో దీపిక మాట్లాడుతూ.. ఈ విషయాన్ని వెల్లడించింది. హేమమాలిని తమబోటి బాలీవుడ్ హీరోయిన్లకు అనేక రకాలుగా ఆదర్శనీయురాలని దీపిక అభిప్రాయపడింది. ఇండస్ట్రీలో నంబర్ వన్ పొజిషన్ ను మెయిన్ టెయిన్ చేయడం అంటే మాటలు కాదు అని దీపిక వ్యాఖ్యానించింది. కొన్ని ఫెయిల్యూర్స్ ను కూడా ఎదుర్కొనడానికి సంసిద్ధంగా ఉండాలని, స్ట్రెస్ రిలీఫ్ కోసం కుటుంబం, వ్యక్తిగత బంధాలు చాలా ముఖ్యం అవుతాయని దీపిక చెప్పింది.
పనిలో పనిగా తన వ్యక్తిగత విషయాలను కూడా దీపిక పంచుకుంది. తన తండ్రి తనకు పెళ్లి సంబంధాలు చూస్తున్నారని చెప్పింది. దీపిక తండ్రి భారత మాజీ బ్యాడ్మింటన్ క్రీడాకారుడు ప్రకాష్ పదుకునే అనే విషయాన్ని వేరే వివరించనక్కర్లేదు.దీపిక ప్రస్తుతం బాలీవుడ్ నటుడు రణ్వీర్ సింగ్ తో ప్రేమలో ఉంది, వీళ్లిద్దరూ డేటింగ్ చేస్తున్నారు అనే ప్రచారం ఒకటి ఉంది. ఈ ప్రేమబంధాన్ని దీపిక ధ్రువీకరించడమూ లేదు, అలాగని ఖండించడమూ లేదు. ఇలాంటి నేపథ్యంలో తండ్రి తనకు పెళ్లి సంబంధాలు చూస్తున్నాడని దీపిక చెప్పడం ఆసక్తిదాయకంగా మారింది.