రెండు నెలల గ్యాప్ తర్వాత నాగచైతన్య మళ్లీ కెమెరా ముందుకు..

రెండు నెలల గ్యాప్ తర్వాత అక్కినేని నాగచైతన్య మళ్లీ కెమెరా ముందుకు రాబోతున్నాడు. అతడి కొత్త సినిమా ‘సవ్యసాచి’ రెగ్యులర్ షూటింగ్ కు రంగం సిద్ధమైంది. నవంబరు 8 నుంచే ఈ చిత్ర షూటింగ్ ఆరంభం కాబోతోంది. ‘యుద్ధం శరణం’ పూర్తి చేశాక రెండు మూడు వారాలు విశ్రాంతి తీసుకున్న చైతూ.. ఆ తర్వాత సమంతతో పెళ్లి హడావుడిలో పడిపోయాడు. పెళ్లి తర్వాత ప్రస్తుతం అతను లండన్లో హనీమూన్ చేసుకుంటున్నాడు. అక్కడి నుంచి తిరిగి రాగానే ‘సవ్యసాచి’ సినిమాను మొదలుపెట్టేస్తున్నాడు చైతూ.

తన కెరీర్లో ‘సవ్యసాచి’ ప్రత్యేకమైన సినిమా అవుతుందని చైతూ ఆశిస్తున్నాడు. ఈ సినిమా విషయంలో అతను చాలా కాన్ఫిడెంటుగా ఉన్నట్లు సమాచారం. ‘యుద్ధం శరణం’ తర్వాత మళ్లీ సక్సెస్ ట్రాక్ ఎక్కడానికి ఈ సినిమా మంచి అవకాశమని అతను భావిస్తున్నాడు. మైత్రీ మూవీ మేకర్స్ లాంటి పెద్ద నిర్మాణ సంస్థ ఈ చిత్రాన్ని ప్రొడ్యూస్ చేస్తోంది. ‘కార్తికేయ’ లాంటి డిఫరెంట్ థ్రిల్లర్ తో దర్శకుడిగా పరిచయమై.. తనకు ‘ప్రేమమ్’తో మంచి విజయాన్నందించిన చందూ మొండేటి దర్శకత్వంలో చైతూ ఈ సినిమా చేయనున్నాడు. ‘కార్తికేయ’ తరహాలోనే చందూ టచ్ ఈ సినిమాలో కనిపిస్తుందట. ఇందులో చైతూ ఓ భిన్నమైన పాత్ర చేస్తున్నాడు. ఇందులో అతడి ఎడమ చేయి తన మాట వినదు. దాని వల్ల అతను ఎలాంటి ఇబ్బందులెదుర్కొన్నాడో ఆసక్తికర రీతిలో చెప్పబోతున్నారు. ఇదొక సైంటిఫిక్ థ్రిల్లర్ తరహాలో సాగుతుందట. ఈ చిత్రంలో బాలీవుడ్ భామ నిధి అగర్వాల్ చైతూకు జోడీగా కనిపిస్తుంది. ఇందులో మాధవన్ ఓ కీలక పాత్ర చేస్తుండటం విశేషం. వచ్చే ఏడాది వేసవికి ‘సవ్యసాచి’ ప్రేక్షకుల ముందుకొస్తుంది.