‘పీఎస్వీ గరుడ వేగ’ సినిమాకు సన్నీ లియోన్ ఎంతగా ఉపయోగపడుతుందో ఇప్పుడే స్పష్టం అవుతోంది. ఇప్పటికే టీవీలో ప్రసారం అవుతున్న ఈ సినిమా టీజర్లో సన్నీ లియోన్ ఐటమ్ సాంగ్ను తెగ వాడేస్తున్నారు. తద్వారా ప్రేక్షకులను థియేటర్లకు రప్పించే ఎత్తుగడను వేసినట్టుగా ఉన్నారు. మరి సన్నీ కోసం ఈ సినిమాకు వెళ్లే వాళ్లూ ఉంటారు. పాజిటివ్ టాక్ కు తోడు సన్నీ కూడా కొంత మంది ప్రేక్షకులను ఆకర్షిస్తూ ఉండవచ్చు.
అంతే కాదట.. సన్నీ దెబ్బకు రాజశేఖర్ సినిమా డబ్బింగ్ వెర్షన్లకు కూడా మంచి డిమాండ్ ఏర్పడుతోందని సమాచారం. ప్రస్తుతం ఈ సినిమా హిందీ, తమిళ, మలయాళ డబ్బింగుల వ్యాపారం గురించిన వార్తలు వస్తున్నాయి. ఈ సినిమాకు వచ్చిన పాజిటివ్ టాక్ తో దీన్ని డబ్ చేయడానికి చాలా మందే ఉత్సాహాన్ని చూపుతున్నారు. ఆ వ్యాపారానికి సన్నీ కూడా ఒక ఆకర్షణగా మారుతోందని సమాచారం.
సన్నీలియోన్ కి ఇండియా అంతటా క్రేజ్ ఉంది. ఆమెకు భారీ పారితోషకం ఇచ్చి సినిమాల్లో నటింపజేస్తున్నారు. ఇలాంటి నేపథ్యంలో సన్నీ నటించిన సినిమాగా ‘పీఎస్వీ గరుడవేగ’ డబ్బింగ్ నిర్మాతలను ఆకర్షిస్తోంది. దీన్ని డబ్బింగ్ చేయడానికి వాళ్లు ఉత్సాహం చూపిస్తున్నారు. ఈ సినిమా హిందీ డబ్బింగ్, శాటిలైట్ వెర్షన్లు రెండున్నర కోట్ల వరకూ పలుకుతున్నాయని సమాచారం. పాజిటివ్ టాక్ కి తోడు సన్నీ ఎఫెక్ట్ తోనే ఇంత ధర వచ్చిందని అంటున్నారు.