యువకథానాయకులతోనూ, మరోవైపు సీనియర్ హీరోలతోనూ నటిస్తూ ఇప్పటికీ బిజీగానే ఉంది చందమామ కాజల్ అగర్వాల్. తనతోపాటు తెరంగేట్రం చేసిన హీరోయిన్లకు అవకాశాలు తగ్గిపోయినప్పటికీ కాజల్ మాత్రం వరుస అవకాశాలు అందుకుంటూ దూసుకుపోతోంది. కాజల్ ప్రస్తుతం `భారతీయుడు-2`, `ముంబై సాగా`, `కాల్ సెంటర్` వంటి సినిమాలతో బిజీగా ఉంది. తాజాగా అభిమానులతో ట్విటర్ ఛాట్ చేసిన కాజల్ పలు ప్రశ్నలకు ఆసక్తికర సమాధానాలిచ్చింది. ప్రభాస్‌తో కలిసి పనిచేయడం చాలా సంతోషంగా ఉంటుందని, రామ్‌చరణ్ మంచి మనసున్న సూపర్‌స్టార్ అని అభిమానుల ప్రశ్నలకు సమాధానాలిచ్చింది. `నా వయసు 17 సంవత్సరాలు. మీరు నన్ను పెళ్లి చేసుకుంటారా?` అని ఒక వ్యక్తి కాజల్‌కు ప్రపోజ్ చేశాడు. దీనికి కాజల్ స్పందిస్తూ.. `నా కంటే తక్కువ వయసున్న వ్యక్తిని పెళ్లిచేసుకోన`ని చెప్పింది. అలాగే తనకు వివాహ బంధం మీద నమ్మకముందని, పెళ్లి చేసుకోవాలనుకున్నప్పుడు తప్పకుండా చేసుకుంటానని కాజల్ చెప్పింది.
