తమిళ సూపర్ హిట్ ’96’ చిత్రాన్ని తెలుగులో ‘జాను’గా తెరకెక్కించారు . తమిళ ఒరిజినల్ కు దర్శకత్వం వహించిన ప్రేమ్ కుమార్ తెలుగు వెర్షన్ కు దర్శకత్వం వహిస్తున్నాడు. తాజాగా ఈ సినిమానుండి ‘ప్రాణం’ అంటూ సాగే లిరికల్ సాంగ్ విడుదలయింది. ఈ సినిమాకు సంగీత దర్శకుడు గోవింద వసంత. ‘ప్రాణం’ పాటకు సాహిత్యం అందించిన వారు శ్రీమణి. చిన్మయి శ్రీపాద.. గౌతమ్ భరద్వాజ్ ఈ పాటను ఆలపించారు. “ప్రాణం నా ప్రాణం నీతో ఇలా గానం తొలి గానం పాడే వేళ తారాతీరం మన దారిలో కాంతులే కురిసేలా చాలా దూరం రాబోవు ఉదయాలనే విసిరేలా” అంటూ ఈ పాట సాహిత్యం సింపుల్ పదాలతో మాయ చేసేలా సాగింది. ఈ పాటకు గోవింద వసంత సున్నితంగా మనసు తీగలను అలా మీటినట్టు ఉండే ట్యూన్ ఇచ్చారు. ఈ పాటను అంతకంటే అందమైన ఫీల్ తో.. ఎంతో సున్నితంగా చిన్మయి.. గౌతమ్ పాడారు. ఈమధ్యకాలంలో తెలుగు సినిమాలలో వచ్చిన బెస్ట్ మెలోడీస్ లో ఇదొకటి అని చెప్పొచ్చు. పాట ట్యూన్ లో కొంత బాధ ధ్వనిస్తున్నప్పటికీ అదే ఈ పాటను మళ్ళీ మళ్ళీ వినేలా చేస్తోంది. ఈ చిత్రంలో నటులు సమంత..శర్వానంద్ జంటగా నటిస్తున్నారు. దిల్ రాజు బ్యానర్ లో ఈ మూవీ తెరకెక్కుతోంది.