బాలీవుడ్ బ్యూటీ క్వీన్ దీపిక పదుకోనే ఓ డీగ్లామర్ రోల్ ను చేయనున్నారు. ఒక ఛాలెంజింగ్ పాత్ర ద్వారా 'ఛపాక్' సినిమాతో ప్రేక్షకుల ముందుకు రాబోతున్నారు. ఢిల్లీలో యాసిడ్ దాడికి గురైన బాధితురాలు లక్ష్మీ అగర్వాల్ జీవితం ఆధారంగా ఈ చిత్రం రూపొందుతోన్నఈ సినిమా షూటింగ్ ప్రస్తుతం ఢిల్లీలో జరుగుతోంది. షూటింగ్లో దీపిక పదుకోనె, విక్రాంత్ మాస్సేపై తీస్తున్న కీలక సీన్లు కొన్ని సోషల్ మీడియాలో లీక్ అయ్యాయి. గ్రీన్ కలర్ కుర్తా, సల్వార్ ధరించిన దీపిక ఆటోలో నుంచి దిగుతున్న దృశ్యాలు సోషల్ మీడియాలో వైరల్ అవుతున్నాయి. గతంలో కూడా ఈ చిత్రానికి సంబంధించిన సీన్లు కొన్ని లీక్ అయ్యాయి. దీపిక, విక్రాంత్పై ఢిల్లీ మార్కెట్లో ఏదో దుకాణం ముందర చిత్రీకరించిన సీన్లు లీక్ అయ్యాయి. షూటింగ్ సంబంధించిన చాలాభాగం పబ్లిక్ ప్రదేశాలలో జనసమూహం మధ్య జరుగుతుండటంతో వీటిని ఆపడం ఎవరితరం కావట్లేదు. మేఘనా గుల్జార్ దర్శకత్వం వహిస్తున్న 'ఛపాక్' సినిమాకు దీపిక కూడా సహ నిర్మాతగా వ్యవహరిస్తోంది. ఈ సినిమా గురించి దీపిక మాట్లాడుతూ 'గాయపడి, గెలిచిన ఓ వ్యక్తి కథ. మనిషికి ఉండే బలమైన ఆత్మవిశ్వాసాన్ని తెలియజేసే ఇలాంటి కథను చేస్తున్నందుకు చాలా గర్వంగా ఉందని అన్నారు. ఈ సినిమా వచ్చే యేడాది జనవరి 10వ తేదీన విడుదలకానుంది.