"ఎక్కడికి పోతావ్ చిన్నవాడ" సినిమాతో తెలుగు ప్రేక్షకులకు పరిచయమైనా నందిత శ్వేతా తన నటనతో అందరిని ఆకట్టుకుంటుంది. నందిత ప్రధాన పాత్రలో తెరకెక్కుతున్న సినిమా "అక్షర". ఈ సినిమా షూటింగ్ పూర్తి చేసుకొని విడుదలకు సిద్దమవుతుంది. ఈ చిత్రం గురించి నిర్మాతలు సురేష్ వర్మ అల్లూరి, అహితేజ బెల్లంకొండ మాట్లాడుతూ.. ‘‘ విద్యావ్యవస్థలోని లోపాలను ఎత్తి చూపుతూ చక్కని పరిష్కారాన్ని ఇచ్చేలా రూపొందించిన కథ ఇది. నందిత శ్వేత పాత్ర ప్రతి ఒక్కరినీ ఆకట్టుకుంటుంది. కమర్షియల్ ఎలిమెంట్స్ తగ్గకుండానే అద్భుతమైన మెసేజ్ తో వస్తోన్న అక్షర షూటింగ్ పూర్తయింది. ప్రస్తుతం పోస్ట్ ప్రొడక్షన్ కార్యక్రమాలు చాలా వేగంగా సాగుతున్నాయి. గతంలో విడుదల చేసిన టీజర్, పాటకు వచ్చిన స్పందన మా నమ్మకాన్ని రెట్టింపు చేసింది. ఇక సినిమా కూడా ప్రతి ఒక్కరినీ ఖచ్చితంగా అలరిస్తుందని నమ్ముతున్నాం. ఇక సినిమాను అక్టోబర్ ద్వితీయార్థంలో గ్రాండ్ గా విడుదల చేయబోతున్నాం’’ అన్నారు.
దర్శకుడు బి. చిన్నికృష్ణ మాట్లాడుతూ.. ‘‘అవుట్ పుట్ పై మాకు పూర్తి సంతృప్తిగా ఉంది. సినిమా చాలా బాగా వచ్చింది. ప్రస్తుతం పోస్ట్ ప్రొడక్షన్ వర్క్స్ కూడా ఫుల్ స్వింగ్ లో సాగుతున్నాయి. అక్షర లాంటి కథలు అరుదుగా వస్తుంటాయి. అలాంటి సినిమాకు దర్శకత్వం వహించే అవకాశం ఇచ్చిన మా నిర్మాతలకు థ్యాంక్స్. మొత్తంగా అక్టోబర్ ద్వితీయార్థంలో వస్తోన్న మా అక్షర మీ అందరికీ నచ్చుతుందని ఆశిస్తున్నా’’ అన్నారు. ఈ చిత్రంలో ఇంకా సత్య, మధునందన్, షకలక శంకర్, శ్రీ తేజ, అజయ్ ఘోష్ ఇతర పాత్రల్లో నటిస్తున్నారు.